නවීන කෙටිකතාව කතාවක් කීමේ අධ්‍යාසය පෙරදැරිකරගත් මාධ්‍යමය සීමා ඛණ්ඩනය කර, එහි උච්චතම සන්ධිස්ථානය කරා සමීප වී සිටී. කෙටිකතාව මේ වන විට ශ‍්‍රව්‍ය දෘශ්‍ය සංකල්ප මතු කරන රූපණ මාධ්‍යයක් බවට පත් ව ඇත. අතිශයින් කම්පනශීලී සංවේදී භාව සසල මනෝගත හා උද්වේගකර සමාජමය පිපිරීම් බඳු අත්දැකීම් නිරූපණයට බටහිර ලේඛකයන් ළගන්නාසුලූ මාධ්‍යය බවට පත්කරගෙන ඇත්තේ කෙටිකතාව ය. නවීන කෙටිකතාව ආකූල හා ව්‍යාකූල පුද්ගල හා සමාජමය අනුභූතියක් කිසියම් රේඛණයක් ඔස්සේ විදාරණය කිරීමට ගන්නා උත්සාහයක් පමණි.
විද්‍යාත්මක ලෝකයේ තාක්ෂණික ආධිපත්‍යයට නතුව ඇති කෙටිකතාව අද දෘශ්‍ය ශ‍්‍රව්‍ය මාධ්‍යයට අනුරූපී වූ මගක ගමන් ගනු පෙනේ. කවි මගට අනුගත වූ නවීන කෙටිකතාකරුවා එහි දී සීමා ඛණ්ඩනය කරමින් කිසියම් සසල මනෝභාවයක් නිරූපණයේ දී එකවර ඇස ද කන ද යොමු කරගත හැකි අයුරින් විවිධ ශිල්පීය උපක‍්‍රම භාවිත කිරීමට පෙළඹෙයි.
මුලූමහත් විශ්ව සාහිත්‍යය පමණක් නොව විවිධ විෂය ක්ෂේත‍්‍ර පිළිබඳ අවබෝධයෙන් තොර ව සමන් කුමාරගේ කෙටිකතාවල අභ්‍යන්තර හරය ගැඹුරින් වටහා ගත නොහැකි ය. දර්ශනය, මනෝවිද්‍යාව ගැඹුරින් වටහා ගත නොහැකි ය. දර්ශනය, මනෝවිද්‍යාව, වාග් විද්‍යාව, රසායන විද්‍යාව, සත්ත්ව විද්‍යාව, ජීව විද්‍යාව, ඉතිහාසය, පුරාවිද්‍යාව හා මාක්ස්වාදය යන විෂය ක්ෂේත‍්‍ර පිළිබඳ අවබෝධයක් නොමැති නම් ඇතැම් කතාවක යථාර්ථය හා බැඳුණු ලේඛක අධ්‍යාසය ගැඹුරින් පසක් කර ගත නොහැකි ය.
සමන් කුමාරගේ කෙටිකතාවලින් අපට හුරු පුරුදු ස්ථාවර ක‍්‍රියාකාරකම් පද්ධතියකින් යුත් සමාජය හඳුනාගත නොහැකි ය. කෙටිකතාවේ සම්මතය අභියෝගයකට හසු කරන ඔහු බුද්ධියෙන්, නුවණැසින් සංජානනය කළ යුතු ලෝකය - සමාජය ග‍්‍රහණය කරගැනීමට උත්සාහ දරා ඇත. පියවි ඇසින් ග‍්‍රහණය කරගත නොහැකි එහෙත් අපගේ මනඃවෘත්තිය මෙහෙයවන ලෝකයේ සත්‍යය විදාරණය කිරීමට සමන් කුමාර පෙළඹුණු බැව් පෙනේ. නිසි පිළිවෙලකට සැලැස්මකට ගොදුරු කර ගත නොහැකි ලෝකය - උඩු යටිකුරු වී විසිරුණු විඥානගත ක‍්‍රියාවලියකින් සංකීර්ණ වූ අද්‍යතන ලෝකයේ සත්‍යය කෙටිකතා මාධ්‍යයෙන් විදාරණය කිරීමට කෙටිකතාකරුවා කුසලතා පූර්ණ වූ සේ ය. භෞතික හා මානසික ක‍්‍රියාකාරකම්වලින් සංකීර්ණ වූ, ආකූල වූ සමාජ සත්‍යය විනිවිද දැක නිරූපණය කිරීමට ඔහු උත්සාහ ගත් බැව් පෙනේ. සම්මත සදාචාර ධර්ම අභියෝගයට හා විවේචනයට හසුකරන ආකාරයේ අත්දැකීම් සමන් කුමාරගේ ඇතැම් කෙටිකතාවලට වස්තු විෂය වූ බැව් පෙනේ.
මහාචාර්ය කුලතිලක කුමාරසිංහ (සාහිත්‍ය උත්සව විශේෂ කලාපය 2008)
No comments:
Post a Comment