"සර්පයාගේ" ලිවීම් මිස, "කියවීම්" මට නොදිරවයි. "තෝනලය" ආදී මාධ්යයන්හි උගුලකට සර්පයාගේ "කියවීම්" වැටී ඇති සෙයක් හඟිමි. ඔහු "ලියන්නෙකු" මිස "කියවන්නෙකු"නොවේ.ඔහුගේ ලාලසාව,රාගය හා ධාරිතාව කියවීම් හි දියව යනු දැරිය නොහැක.
සර්පයාගේ "කියවීම්" ගැන මාගම් සෝලින්,සර්පයා පොදු සමාජයට කැඳවා ඇති හෙයින්, "එයත් ඇවැසියැ"යි කෙටියෙන් කියමි.
සර්පයාගේ ලිවීම්වල සම්බෝධිය "නේරංජනේ ඉස්නානේ" ය. එය පල කෙරෙනුයේ, 1993 දී ය.එතැන් පටන්, අද දක්වා අතට අසුවෙන,මතක් වෙන හැම විටම කියවමින්, යළි යළිත් සම්බෝධිය සොයමි.විඳිමි.
"නේරංජනේ ඉස්නානේ" ගැන කළ, මා දන්නා ප්රථම විචාරය කළේ සිංහල ගුරුවරයෙකු වූ, ස්වාමීන් වහන්සේ නමකි.ඒ, 1995 දී විය යුතුය.
"ඔය මිනිහා ඔය චන්ද්රිකා ගේ ඡන්ද කැම්පේන් එකනෙ කළේ. ගෑණියෙක් බුදු වෙනවා කිව්වේ චන්ද්රිකා ජනාධිපති වෙන එකනේ".
ථේරවාදි ගැහැණියක් බුදු වූයේ පළමුවරටය. ඇතමුන්,නේරංජනා ඉස්නානේ මහායාන සුත්රයකැයි කියති. එය ථේරවාද අටුවාවකැයි කියමි.
ශාසනයේ ආයුෂ නම් විනයයි.එනම් ධර්මයේ ශික්ෂණය වීමයි.ධර්මයේ පැවතීමයි.
ශාසනය ඉන් විනිර්මුක්ත වූ පසු, බුදුවන්නට ඇවැසි කෙනෙකුට බුදුවන්නට තැනක් නැතිද?.ඇත.ඊට ශාසනයෙන් මහාභිනික්මන් කළ යුතුය.
ඒ සඳහා පිරිමියෙකුට ධෛර්යයක් නැත.ඔහුගේ සියල්ල ශාසනයයි.ශාසනයෙන් විනිර්මුක්ත පැවැත්මක් ඔහුට නැත. මෙනයින්,ශාසන වියුක්ති පිරිමි පැවැත්ම හිස්ය.
එහෙත් ගැහැනියට එසේ නොවේ.ශාසනය ඇයට බුදුවන්නට ඉඩනොදේ.ඇයගේ සියල්ල උකහාගෙන වියෝ කරනු වස් ඇයරදවාගෙන සිටී.ඇය බුදුවනවානම් ශාසනයෙන් වියුක්ත විය යුතුය.මෙනයින්,ශාසන වියුක්ත ස්ත්රි පැවැත්ම ශුන්යය.
ශාසනයෙන් වියෝව, මහාභිනික්මන සඳහා ඈ ඇය මත පටවන ලද සියලු පළිබෝධ අතහළ යුතුය.
”ඈ නැඟී සිටියාය. සියලූ කිලි කුණු ඒ අනෝරාවෙන් සේදී ගොස් තිබිණි. ඈ දෙපා අසල රන් කගක් විය. ඈ එය අතට ගත්තාය.
”සන්තානගත සකල ක්ලේශයෙහිම නිමිත්තක් බඳු වූ ඒ කේශ කලාපය සිඳ විසි කළාය. එකල්හි ඒ අහසෙහි මඳක් රැඳී තිබිණි.
”ඈ තම සිරුරෙහි එල්ලී තිබූ වැරැලි කිහිපය ගලවා දැමුවාය. අනතුරුව ඕ නේරංජනයට බැස්සාය. එහි සැනහෙමින් නෙළුම් පතක් කඩා ‘මාගේ අධිෂ්ඨානය පරිදි වේවයි.’ කීවාය. එකල්හි ඒ උඩුගං බලා ඇදිණි.
”ඈ නේරංජනයෙහි සැනහෙමින් එගොඩට පිහිනී. ඉවුරට ගොඩව මෙගොඩ බැලී. මෙතුවක් දවස් තමා පසුපස තමාගේ මේ විපරියාසයෝ දර්ශනය කළ සතා සතුන් සියල්ලෝ තවදු එක එල්ලේ බලා සිටියෝය.
”ඈ උනට පිටු පා ඒ වන ගහනය තුළ නොපෙනී ගොස් බොහෝ වේලා යන තෙක්ම උහු ඒ බැල්මෙන්ම එදෙස බලා හුන්නෝය.”
(නේරංජනේ ඉස්නානේ 148 පිට.)
එසේම,ඇය "ඇගේම වන සියල්ල" අත්පත් කරගත යුතුය.
ශාසන ඇසට කමටහන් සඳහා ඉවත් කළ සියල්ල ඇය අත්පත් කරගත යුතුය.හරියට ශරීරයේ කැමති තැන කැමති පරිදි රෝම වැවෙන්නට ඉඩ හැරීම වැනිය. ශාසන ගතට සුව සඳහා ඉවත් කළ සියල්ල ඇය අත්පත් කර ගත යුතුය.
මේ අත්පත් කර ගැනීම් හා ඉවත් කිරීම් හෙවත් බැඳීම් අවසන් කළ පසුව ඈ ආලය විඥාන ප්රවාහයට එක්වෙයි.එනම් සංසාරගත වෙයි.
ඒ අසීති සංසාර ප්රවර්තනයේ ආලය විඥාන ප්රවාහයේ අතීත අනාගතාදි කාල බැඳීමක් අවකාශ වසඟයක් රහිතව දියව යයි.
බුද්ධත්වයනම් ඒ ය.
පුරුෂයෙකුට බුද්ධත්වය උදෙසා පුරුෂත්වය අභිනිෂ්ක්රමණය සෑහෙන අතර, ස්ත්රියකට බුද්ධත්වය උදෙසා පුරුෂත්වය පරාජය කොට ස්ත්රිත්වය අභිනිෂ්ක්රමණය කිරීම කළ යුතුය.
No comments:
Post a Comment